Laerskool Voorpos het ‘n ryk geskiedenis. Die skool is oorspronklik opgerig vir die Hoërskool Oos-Moot, maar na 'n paar maande word daar besef dat die gebou ontoereikend is. Hierna word besluit om dit vir 'n Engelsmedium skool aan te wend, maar daar was te min leerlinge om dit te laat realiseer. Die skoolgebou het bestaan uit een ry klaskamers en die biblioteek het as saal gedien.
Die skool word op 21 Januarie 1957 geopen as Waverley Afrikaans Medium met slegs drie personeellede, mnr. HJ Greeff, me. H de Wet en me. JW Swanepoel. ‘n Ingeskrewe leerlingtal van 112 leerlinge noodsaak egter ‘n verdere aanstelling en mnr. S du Plessis sluit op 24 Januarie aan as die vierde personeellid. Hy word egter reeds op 28 Januarie verplaas en word vervang deur mnr. SJ de K Kruger. Me. SJC Cloete aanvaar op 1 Februarie 1957 diens as sekretaresse van die skool. Me. EJ Vorster neem die plek in van me. JW Swanepoel aan die begin van die tweede kwartaal en me. JA le Roux neem in September by me. Cloete oor as sekretaresse.
Na ‘n voorstel van mnr. SJ de K Kruger word daar op 5 November 1957, tydens ‘n Skoolkomiteevergadering, besluit om die skool se naam te verander. Op 27 Oktober 1959 verander die skool se naam na Voorposskool. Die naam verwys na die strewe om ‘n Voorpos te wees op die gebied van opvoeding en onderwys.
Die leerlingtal groei in 1958 tot 193 leerlinge wat verdere leerkragte noodsaak. Mnr. HJ Greeff dien vir twee jaar as die waarnemende hoof tot 1 Januarie 1959 waarop mnr. J Huyser as die eerste permanente hoof aangestel word. Laerskool Voorpos sluit 1959 af met 259 leerlinge en nege personeellede
Op 30 Januarie 1961 neem mnr SJ de K Kruger by mnr Huyser oor en neem waar as hoof vir die jaar waartydens mnr. Huyser na die Pretoriase Onderwyskollege gesekondeer is. Mnr. Huyser hervat weer sy pligte as hoof op 29 Januarie 1962 met 252 inskrywings en dertien personeellede. Die eerste skoolwapen, ontwerp deur mnr. SJ de K Kruger, word op 30 Mei 1961 onthul met die volgende ontleding, die punt van Afrika, ‘n verkenner te perd in aksie as verkenner, ‘n ster wat die kasteel in die Kaap simboliseer, ‘n monument as simbool van eenheid en die opkomende son as simbool van ‘n jong land, volk en skool. Die skool se leuse, “Ons sal antwoord op jou roepstem” verskyn op die leuselint en is direk uit die ou Volkslied geneem
Die skoolwapen moes herontwerp word om aan die vereistes van die Buro van Heraldiek te voldoen vir registrasie. Die finale sertifikaat word in 1980 van die Buro ontvang en die wapen word in gebruik geneem. Die nuwe wapen se ontleding is die omgekeerde gebroke keper(bepaalde driehoekvorm) met die boonste punt gelig omdat die voorposte vroeër op die hoogste uitkykpunte aangebring is. Die ruiter se spoor vervang die ruiter en die perd van die vorige wapen en sinspeel op aansporing. Die leuselint is net so oorgeneem uit die vorige wapen.
Teen Augustus 1962 is daar vier ekstra klaskamers en ‘n kantoor vir die onderhoof aangebou. Daar is begin met die skep van ‘n biblioteek en ‘n rugbyveld en korfbalbaan is reeds in gebruik. Die skoolsaal (Voorpossaal) word op Vrydag 15 November 1963 ingewy. Voorpos skop 1964 af met 589 ingeskrewe leerders en agtien personeellede. Mnr Huyser word op 4 Julie 1964 deur mnr. CL Steyn as skoolhoof opgevolg.
Leerlinggetalle groei steeds en 1966 sluit af met 674 leerlinge en 22 personeellede. Op 25 November 1966 word die swembad in gebruik geneem. In 1967, tien jaar na die stigting van Laerskool Voorpos, het die eertydse vier personeellede en 112 leerlinge gegroei tot 23 personeellede en 689 leerlinge. Die tennisbane word op 20 September 1969 tydens die skoolkermis amptelik in gebruik geneem en op 6 November 1971 word die pawiljoen onthul.
Op 24 Januarie 1977 ontvang mnr. CL Steyn ‘n aanstelling as Inspekteur van onderwys en mnr. S de K Kruger neem weer waar as hoof tot 9 Januarie 1978 waarop dr. CL Kirstein mnr. Steyn opvolg as skoolhoof en dien tot 1981 en mnr. CJ Louwrens word in Julie 1982 aangestel as hoof. Mnr. BJE Badenhorst word in 1987 skoolhoof en tydens sy termyn vind die volgende uitbreidings plaas: Nuwe krieket fasiliteite, die bou van die lapa en spreiligte op die rugbyveld.
Die styging in leerdergetalle noodsaak die uitbreiding van die administratiewe gedeelte met die inbruikneming van die huidige personeelkamer en die ou personeelkamer word omskep in ‘n kantoor en konferensielokaal. Voorpos spog met hul eerste graad R-klas in 1987. Hierna volg nog klaskamers, kleedkamers by die rugbyveld, opgradering van die kiosk en die KDP lokaal. Stygende leerdergetalle noodsaak dat stoorkamers, die kolekamer en busloods in klaskamers omskep word.
Mnr. MF Venter volg mnr. Badenhorst op na sy aftrede in 2006 en hy dien as sewende hoof van die skool tot Junie 2008. Mnr. JA van der Westhuizen neem waar vanaf die derde kwartaal 2008 tot aan die einde van die eerste kwartaal 2009 waarop mnr. Marius Swart op 1 April 2009 aangestel word as hoof. Mnr Swart tree aan die einde van 2022 af en mnr JA van der Westhuizen neem weer waar as hoof tot en met die aanstelling van mnr. Gerhard Engelbrecht op 1 November 2023 as huidige skoolhoof.
SKOOLTYE:
Gr. 1 – 3:
Maandag – Vrydag: 07:25 – 13:15
Gr. 4 – 7:
Maandag – Donderdag: 07:25 – 13:45
Vrydag: 07:35 – 13:15